Хрестоматия по истории

ПОВЕСТЬ О ВОССТАНИИ МОСКОВСКИХ «ЧЕРНЫХ» ЛЮДЕЙ И О РАЗОРЕНИИ МОСКВЫ ТОХТАМЫШЕМ В 1382 г.

 Повесть о восстании московских «черных людей» и о взятии Москвы в 1382 г. ханом Тохтамышем берется с сокращениями по тексту «Никоновской летописи» («Полное собрание русских летописей», издание Археографической комиссии, т. XI, СПБ 1897). В первоначальном своем виде эта повесть до нашего времени не сохранилась, подвергнувшись различного рода дополнениям. Автор повести враждебно относится к восстаниям «черных людей», называя их «злыми людьми», но и в таком виде повесть показывает размеры восстания москвичей, взявших на себя защиту Москвы, после того как из нее трусливо бежали митрополит и бояре, испугавшиеся татар. Москва была взята благодаря предательству двух суздальских князей, сопровождавших Тохтамыша.

ВНЕЗАПНЫЙ ПОХОД ТОХТАМЫША К МОСКВЕ

Царствующу царю Тохтамышу на Воложском царствии, и поморскыми грады обладающу во Орде и в Сараи, и бысть в третие ее лето царство его, посла татар своих во град, нарицаемый Болгары  еже есть Казань на Волзе, и повеле кристианьския купцы избити, а гости русскиа грабити, а суды их и товары отнимати и провадити к себе на перевоз. А сам с великою яростию собрав силы многи и поиде к Волзе со князи своими и со всею силою своею татарскою. И перевезеся на сю сторону Волги реки и поиде на великого князя Дмитрея Ивановича к Москве изгоном и на всю Русскую землю; ведяше бо рать изневести внезаапу со умением и тацем злохитрием, не дающе вести про себя, да не услышано будет...

А князь Олег Рязанский срете царя Тохтамышя на украинах своея земли Рязаньскиа и доби ему челом, дабы не воевал земли его, и обведе его около своея земли; и бысть ему помощник на победу Руси и поспешник на пакость кристианом, и ина некая словеса изнесе о том, како пленити землю Русскую и како без труда взяти камен град Москву и како победита и изнимати великаго князя Дмитриа Ивановича. А в то время неколисии едва прииде весть к великому князю Дмитрию Ивановичю, возвещающе рать татарьскую; аще бо и не хотяше Тохтамышь, дабы кто принес весть на Русскую землю о его приходе, — того бо ради вси гости русскиа поимани быша и пограблени и удержани, дабы не было  на Руси, — но обаче суть нецыи доброхоты на пределах Ординьских, на то устроени, поборницы суще земли Русстей.

Слышав же таковую весть князь великий Дмитрей Ивановичь, что идет на него сам Тохтамышь царь во множестве силы своея, и нача совокупляти полцы ратных, и собра воя многи, и выеха из града с Москвы, и хотя итти противу ратных. Таже начя думати таковую думу и размысли з братом своим   и с прочими князи и з бояры своими, и обретеся в них разность, не хотяху помогати, не помянуша Давида пророка глаголюща: «се коль добро и коль красно еже жити братии вкупе»; и другому приснопомнимому рекшу: «друг другу пособляа и брат брату помогая, яко град тверд есть».

Бывшу же промежу ими неединачеству и неимоверьству, и то познав и уразуме князь великий Дмитрей Ивановичь, во князех и в боярех своих и во всех воиньствах своих разньство и распрю, еще же и оскудение воиньства; оскуде бо вся земля Русская от Мамаева побоища за Доном, и вси русстии людие в велице страсе и трепете бышя за оскудение людей. Сам же князь великий в недоумении и розмышлении бысть, и не хотя стати противу самого царя, ни поднял руки противу его, и поиде сам князь великий Дмитрей Ивановичь не во мнозе во град свой Переяславль, а оттуда поиде мимо Ростов и, паки реку , вборзе и на Кострому.